Në kuadër të Ditëve të Arsimimit Mediatik 2026, „Lice v Lice“ organizoi një punëtori për shitësit dhe koordinatorët e saj, me fokus njohjen e dezinformatave dhe lajmeve të rreme, verifikimin e informacionit dhe shpërndarjen e përgjegjshme të përmbajtjeve.
Si mund ta dallojmë nëse informacioni që dëgjojmë ose lexojmë në rrjetet sociale është i besueshëm? Nga bisedat e përditshme deri te platformat digjitale, informacioni qarkullon vazhdimisht, por jo gjithçka që na përcillet është e verifikuar, e saktë apo e plotë. Pikërisht këtyre çështjeve iu kushtua punëtoria „Kush të tha? Përballë informacionit – nga bisedat e përditshme te rrjetet sociale“, të cilën „Lice v Lice“ e mbajti sot në hapësirat e organizatës „Publik“.
Punëtoria ishte dedikuar për shitësit dhe koordinatorët e rrjetit të shpërndarjes së revistës „Lice v Lice“ dhe ishte pjesë e programit të Ditëve të Arsimimit Mediatik.
Nga bisedat e përditshme te informacioni i verifikuar
Kur një informacion e dëgjojmë nga një mik, e lexojmë në një postim në rrjetet sociale apo e marrim përmes një mesazhi, sa shpesh ndalemi për të kontrolluar nëse është i saktë? A arrijmë të dallojmë faktin nga mendimi personal, thashethemin nga informacioni i verifikuar dhe dezinformimin nga një përmbajtje që thjesht nuk na pëlqen?
Përmes diskutimeve dhe shembujve praktikë, pjesëmarrësit patën mundësinë të reflektonin mbi mënyrën se si i pranojmë, interpretojmë dhe shpërndajmë informacionet. Vëmendje e veçantë iu kushtua edhe pasojave të përhapjes së mëtejshme të tyre, veçanërisht kur bëhet fjalë për pretendime të paverifikuara, të cilat mund të ndikojnë në qëndrimet, vendimet dhe marrëdhëniet brenda komunitetit.
Në një kohë kur secili mund të publikojë dhe të shpërndajë përmbajtje për një audiencë të gjerë, verifikimi i informacionit dhe mendimi kritik janë aftësi të rëndësishme për jetën e përditshme.
Arsimimi mediatik sot – të gjithë kemi rolin tonë
Përmes pjesëmarrjes në Ditët e Arsimimit Mediatik 2026, „Lice v Lice“ thekson rëndësinë e qasjes në informacion të besueshëm dhe të zhvillimit të mendimit kritik te njerëzit me përvoja dhe mundësi të ndryshme jetësore.
Arsimimi mediatik nuk është vetëm për gazetarët, profesionistët që punojnë me informacionin apo personat me arsimim formal. Ai është një aftësi e përditshme që na ndihmon të kuptojmë mesazhet që na përcillen, të bëjmë pyetje, të identifikojmë pretendimet e dyshimta dhe të marrim vendime më të informuara.
Motoja e sivjetme e fushatës kombëtare të Ditëve të Arsimimit Mediatik është „Të gjithë kemi rolin tonë“, në përputhje me temën globale të UNESCO-s „We All Play a Part – Media and Information Literacy for the People“ (Të gjithë kemi një rol – Edukimi mediatik dhe informativ për njerëzit).
Ditët e Arsimimit Mediatik (DEM) mbahen nga 26 tetori deri më 2 nëntor, me aktivitete që theksojnë rolin e secilit në ndërtimin e një shoqërie më të informuar dhe më të përgjegjshme. Ato organizohen nga Rrjeti për ArsimimMediatik.
