ДЕНОВИ НА МЕДИУМСКА ПИСМЕНОСТ 2023

Мрежата за медиумска писменост во периодот од 24-31 октомври ги организираше „Деновите на медиумска писменост 2023“, со кои прослави мал јубилеј, 5-то издание на најзначајниот национален настан за мобилизирање на граѓаните, образовните установи, граѓанските организации, медиумите и државните институции и за подигнување на свеста за важноста на медиумската и информациската писменост.

„Деновите на медиумска писменост 2023“ се одржаа под мотото: „БРЗ ПРСТ, ЛАЖНИ ВЕСТИ НОСИ“, со голем број разновидни настани, преку кои Мрежата даде свој придонес кон одбележувањето на Глобалната недела на медиумска и информациска писменост во организација на Алијансата за медиумска и информациска писменост на УНЕСКО. Оваа година темата на ДМП беше: „Медиумска писменост во дигиталните простори“ и, како и обично, беше произлезена од темата на Глобалната недела.

Свои активности за време на ДМП 2023 организираа повеќе членки на Мрежата за медиумска писменост: Фондацијата Метаморфозис, Македонскиот институт за медиуми, Институтот за комуникациски студии, Здружението на новинари, Советот за етика во медиумите, Институтот РЕСИС, Младинскиот образовен форум и Радио МОФ, Проектот на УСАИД „Младите размислуваат“ што го раководи ИРЕКС и Агенцијата за аудио и аудиовизуелни медиумски услуги. Паралелно со програмата на настани, Јавниот радиодифузен сервис МРТ ги збогати своите програмски содржини со повеќе емисии посветени на темата медиумска писменост и зачестено ги емитуваше најавите за одржувањето на манифестацијата. Новинската агенција МИА, исто така, ја презеде улогата на медиумски поддржувач на манифестацијата со серија прилози за настаните, а информации објавуваа и онлајн медиумите portalb.mk, vistinomer.mk и meta.mk. Поддршка при организирањето на некои од настаните дадоа Делегацијата на Европската Унија и Претседателскиот центар за политичко образование.

Видео и аудио спотот за најавата на Деновите на медиумска писменост 2023 се достапни на следните линкови: